1 Μετὰ ἡμέρας ὀλίγας εἶδον αὐτὸν εἰς τὸ πεδίον τὸ αὐτό , ὅπου καὶ τοὺς ποιμένας ἐωράκειν , καὶ λέγει μοι · Τί ἐπιζητεῖς ; Πάρειμι , φημί , κύριε , ἵνα τὸν ποιμένα τὸν τιμωρητὴν κελεύσῃς ἐκ τοῦ οἴκου μου ἐξελθεῖν , ὅτι λίαν με θλίβει . Δεῖ σὲ , φησί , θλιβῆναι · οὕτω γάρ , φησί , προσέταξεν ὁ ἔνδοξος ἄγγελος τὰ περὶ σοῦ · θέλει γάρ σὲ πειρασθῆναι . Τί γάρ , φημί , κύριε , ἐποίησα οὕτω πονηρόν , ἵνα τῷ ἀγγέλῳ τούτῳ παραδοθῶ ; 2 Ἄκουε , φησίν · αἱ μὲν ἁμαρτίαι σου πολλαί , ἀλλ᾿ οὐ τοσαῦται , ὥστε τῷ ἀγγέλῳ τούτῳ παραδοθῆναι · ἀλλ᾿ ὁ οἶκός σου μεγάλας ἀνομίας καὶ ἁμαρτίας εἰργάσατο , καὶ παρεπικράνθη ὁ ἔνδοξος ἄγγελος ἐπὶ τοῖς ἔργοις αὐτῶν καὶ διὰ τοῦτο ἐκέλευσέ σὲ χρόνον τινὰ θλιβῆναι , ἵνα κἀκεῖνοι μετανοήσωσι καὶ καθαρίσωσιν ἑαυτοὺς ἀπὸ πάσης ἐπιθυμίας τοῦ αἰῶνος τούτου . ὅταν οὖν μετανοήσωσι καὶ καθαρισθῶσι , τότε ἀποστήσεται ἀπὸ σοῦ ὁ ἄγγελος τῆς τιμωρίας . 3 λέγω αὐτῷ · Κύριε , εἰ ἐκεῖνοι τοιαῦτα εἰργάσαντο , ἵνα παραπικρανθῇ ὁ ἔνδοξος ἄγγελος , τί ἐγὼ ἐποίησα ; Ἄλλως , φησίν , οὐ δύνανται ἐκεῖνοι θλιβῆναι , ἐὰν μὴ σὺ ἡ κεφαλὴ τοῦ οἴκου θλιβῇς · σοῦ γὰρ θλιβομένου ἐξ ἀνάγκης κἀκεῖνοι θλιβήσονται , εὐσταθοῦντος δὲ σοῦ οὐδεμίαν δύνανται θλῖψιν ἔχειν . 4 Ἀλλ᾿ ἰδού , φημί , κύριε , μετανενοήκασιν ἐξ ὅλης καρδίας αὐτῶν . Οἶδα , φησί , κἀγώ , ὅτι μετανενοήκασιν ἐξ ὅλης καρδίας αὐτῶν · τῶν οὖν μετανοούντων εὐθὺς δοκεῖς τὰς ἁμαρτίας ἀφίεσθαι ; οὐ παντελῶς · ἀλλὰ δεῖ τὸν μετανοοῦντα βασανίσαι τὴν ἑαυτοῦ ψυχὴν καὶ ταπεινοφρονῆσαι ἐν πάσῃ πράξει αὐτοῦ ἰσχυρῶς καὶ θλιβῆναι ἐν πάσαις θλίψεσι ποικίλαις · καὶ ἐὰν ὑπενέγκῃ τὰς θλίψεις τὰς ἐπερχομένας αὐτῷ , πάντως σπλαγχνισθήσεται ὁ τὰ πάντα κτίσας καὶ ἐνδυναμώσας καὶ ἴασίν τινα δώσει αὐτῷ · 5 καὶ τοῦτο πάντως , ἐὰν ἴδῃ τὴν καρδίαν τοῦ μετανοοῦντος καθαρὰν ἀπὸ παντὸς πονηροῦ πράγματος . σοὶ δὲ συμφέρον ἐστὶ καὶ τῷ οἴκῳ σου νῦν θλιβῆναι . τί δέ σοὶ πολλὰ λέγω ; θλιβῆναί σὲ δεῖ , καθὼς προσέταξεν ὁ ἄγγελος κυρίου ἐκεῖνος , ὁ παραδιδούς σὲ ἐμοί · καὶ τοῦτο εὐχαρίστει τῷ κυρίῳ , ὅτι ἄξιόν σὲ ἡγήσατο τοῦ προδηλῶσαί σοὶ τὴν θλῖψιν , ἵνα προγνοὺς αὐτὴν ὑπενέγκῃς ἰσχυρῶς . 6 λέγω αὐτῷ · Κύριε , σὺ μετ᾿ ἐμοῦ γίνου , καὶ δυνήσομαι πᾶσαν θλῖψιν ὐπενεγκεῖν . Ἐγώ , φησίν , ἔσομαι μετὰ σου · ἐρωτήσω δέ καὶ τὸν ἄγγελον τὸν τιμωρητήν , ἵνα σὲ ἐλαφροτέρως θλίψῃ · ἀλλ᾿ ὀλίγον χρόνον θλιβήσῃ καὶ πάλιν ἀποκατασταθήσῃ εἰς τὸν οἶκόν σου . μόνον παράμεινον ταπεινοφρονῶν καὶ λειτουργῶν τῷ κυρίῳ ἐν πάσῃ καθαρᾷ καρδίᾳ , καὶ τὰ τέκνα σου καὶ ὁ οἶκός σου , καὶ πορεύου ἐν ταῖς ἐντολαῖς μου αἷς σοὶ ἐντέλλομαι , καὶ δυνήσεταί σου ἡ μετάνοια ἰσχυρὰ καὶ καθαρὰ εἶναι · 7 καὶ ἐὰν ταύτας φυλάξῃς μετὰ τοῦ οἴκου σου , ἀποστήσεται πᾶσα θλῖψις ἀπὸ σοῦ · καὶ ἀπὸ πάντων δέ , φησίν , ἀποστήσεται θλῖψις . ὅσοι ἐὰν ἐν ταῖς ἐντολαῖς μου ταύταις πορπορευθῶσιν .
